طفولتي

السلام عليكم

من اين ابدء وطفولتي عباره عن حرمان وفقر انا لم اولد وفي فمي
ملعقه من ذهب وقسما بالله لو اولد وفي فمي سن واحد ثاني يوم ولادتي
ولا سن بحلكي فكيف اكل التفاح والعرموط مثل باقي الاطفال وانا لا املك
سن واحد في فمي


طفوله بائسه حتى الباودر او التالك او في روايه اخرى البوطره جانت تحاربني
من يصير احمرار بين الارداف مايسمى المسمط نتيجه الشخه والتبول الباودر
يحاربني من يحطوه على زروري يتحول الى لامندوزي يحرقني يحرقني اوي اوي
وكذلك المميه تحاربني الديس مال المميه يتحول الى صخر من يفوت بحلكي امص
بيه ولا عبالك اي ذكرتوني بديس المميه جان اله هيبه ديس المميه يخبل ديس المميه
اذكره جان جوزي الديس مال المميه اني حتى من اكون شبعان حليب اسوي نفسي
مو شبعان وابجي حتى ينطوني حليب بالمميه وديس المميه جان اله حوبه

حتى الحليب جان يحاربني نعم جان اول مايفوت حلكي يتحول روبه وشماله
روبه حامضه كل الاطفال جانوا ياكلون سريلاك الا انا جان غالي وابويه
ماعنده الامكانيه يجيب سريلاك اليه وجانت امي تقشمرني وتنطيني فلافل
تهرسها وتنكعها بالماي وتطلع تشبه السريلاك وتنطيها اليه طفوله بائسه


وكذلك الحظاين حاربتني من جانوا يكمطوني يتحول الكماط الى سلاسل حديده
وامي جانت اتكمطني بقوه اتشدني شد عبالك جاي تشد زوليه مو كائن حي بريئ
مثلي وجان كل الاطفال يحطولهم حفاظات بامبرز الا اني جانوا يحطولي ليفه
نعم ليفه وتعرفون الليفه خشنه خشنه اوي اوي وجنت اتالم من جوه شنو جوه
الجوه يعني شلون اكتبها جنت من حوه احترق احترق اوي اوي اه اه رعب
رعب كل ما اذكرها اكوم احك بجسمي كله


اما امي ماجانت تسويلي واني طفل حديث الولاده ماتسويلي جق جق جق
باصبعها على حلكي حتى اضحك ابد ولا تيت تيت تيت بوجهي حتى اضحك
مثل باقي الاطفال بس جانت تباوع عليه وتكول شوكت تكبر ياحمودي وتصير
بجيش المهدي وافتخر بيك بين النسوان واكول ابني اليوم سمط مركز الشرطه
بقذيفه كل الشرطه طكتله تحيه

حتى الهدايا ماكو جانت كل وحده من تجيب طفل النساوين تجيب هدايه للمولود
الجديد الا اني من اجيب ولا وحده بت زفره من نسوان المحله جابت هديه علما
امي من جابت جوارينه ام خزعل من جابت خزعل امي ودت واجب وجابت هديه
لام خزعل سياره بي ام دبليو حديثه بس اني من اجيت ام خزعل بت الكلب كلشي
ماجابت حتى التهنئه صاحت امي من وره السياج وكالت مبروك ولادة ابنج حمودي
ان شاء الله يكبر وتشوفيه عريس واعتقد هي هاي ام خزعل الجلبه هي الي فكرتني
من وراها لحد ان بكد الثور صرت وماكو عرس وعريس


حتى بالحظانه من رحت الها هناك الاطفال مختلط بنات وولد جنت كل ما اقترب
من ابنيه تبتعد مني وتكلي دروح ابو شخه شنو هذا الحجي كل الاطفال يشخون
يعني كل الاطفال يشخون ميرنده واني بس اشخ يوريا حتى يوم اعترفت الى طفله
بالحظانه وكتلها احبك ولحد الان اذكرها جانت المميه بحلكها من سمعت كلمة احبك
كامت تزوع وغمت روحها وصار عدها شلل اطفال وبعدين سافرت الى افغانستان
وصارت بالقاعده


طفوله بائسه حرامات من جنت طفل حتى الكارتون حاربني الوحيد اني من الاطفال
الساعه سته من تصير فترة برامج الاطفال الوحيد تلفزيونه جان يكطع الكارتون ويطلعون
صدام حسين وهو يزور احد المحافظات وما اشوف الكارتون طفوله قاسيه قاسيه اوي اوي